செருப்பைக் கழுவுங்கள்

                    உங்கள் செருப்பைக் கழுவுங்கள்

                                      மாதம் ஒருமுறை.

                                      வயதாக ஆக,

                                      வாரம் ஒருமுறையாவது.

                                      ஆள்வைத்துக் கழுவினால்

                                      அழுக்கும் சிரிக்கும்

                                      அவரவரே கழுவுவது அவசியம்.

                                      அப்புறம்...

                                      மறுபுறம் கழுவுவது

                                      மகத்துவமாகும்.

                                      சும்மா துடைத்து

                                      பளபளப்பாக்கினால்,

                                      உள்ளழுக்குச் சேரும்.

                                      குளிக்காதவர்

                                      முகப்பூச்சுப் போல.

                                      இது நன்றிக்கடன் அல்ல,

                                      ஆயினும்,

                                      சொன்னாலும் தவறில்லை, 

                                      கழுவும்போது கவனம்!

                                      கை சுத்தமா?

                                      முன்னும் பின்னும்?

                                      சரி கழுவுங்கள்.

                                      என்ன மௌனம்?

                                             ‘நானே எப்படி’ எனும்

                                      நாகரிகத் தடையோ?

                                      இல்லையேல்,

                                      உங்கள் உறுப்புகளை-

                                      காசுக்குச் சிலரும்,

                                      உடம்பை

                                      கடனுக்குச் சிலரும்

                                      விரைவில் கழுவ நேரும்.

                            ஆகா.. அடடே!

                            செருப்பு என்றா சொன்னேன்?

                            செருக்கு என்பதே சரி.

                            ஆனால்...

                            இரண்டும் சரிதான்.

--------------------------------