இதுதான் “மோடி வித்தை”யா மிஸ்டர் மோடி? (ரூ.500, 1000 செல்லாதாமே?)

வர வர இந்தியாவின் பிரதமர் மோடிஜி, ”துக்ளக் ஆட்சி“யை நினைவு படுத்திக் கொண்டே இருக்கிறார்.. அவர்தான் திடீரென்று “நாணயங்கள் எல்லாம் இனி தோலில் வெளியிடப்படும்.. முந்திய அரசாணைகள் செல்லாது” என்பதுபோல திடீர் அறிவிப்புகளை வெளியிடுவாராம்!

நமது இன்றைய பாரதப் பிரதமரும் இரவு 08-11-2016அன்று இரவு 9மணிக்கு தொலைக்காட்சியில் தோன்றி, “இன்றிரவு 12மணிமுதல் ரூ.500, 1000 நோட்டுகள் செல்லாது” என்று அறிவித்து, நாடு முழுவதும் பரபரப்பை நிகழ்த்தியிருக்கிறார்! ஏழை பாழைகள் நாயாய், பேயாய் அலைகிறார்கள்!

இதனால், “கள்ள நோட்டுப் புழக்கம் அறவே ஒழியும். கணக்கில் வராத ரூபாய்கள் மதிப்பிழக்கும், ஊழல் ஒழியும்” என்று விளக்கம் தருகிறார்கள்!

இந்த வாதத்தை ஏற்றுக்கொண்டு, சில கேள்விகளை முன்வைக்கிறேன்-

(1)  தமிழக சட்டமன்றத் தேர்தல் நேரத்தில் பிடிபட்ட ரூ.5,000 கோடி “கண்டெய்னர்” என்னாச்சு? அது கள்ளப் பணமா? நல்ல பணமா? இது ஊழல் பணம்தானே? ஊழல் செய்தது யார்? காப்பாற்றியது யார்? - http://valarumkavithai.blogspot.com/2016/05/blog-post_18.html

(2)  நாடாளுமன்றத் தேர்தல் நேரத்தில், “சுவிஸ் வங்கியில் கிடக்கும் இந்தியர்களின் பணத்தை மீட்டு, இந்தியர் ஒவ்வொருவருக்கும் பதினைந்து லட்சம் ரூபாயை அவரவர் வீட்டுக்கு அனுப்புவேன்” என்ற திருவாளர் மோடி அவர்களின் வாக்குறுதி என்னாச்சு?

(3)  பன்னாட்டு, உள்நாட்டுப் பெருமுதலாளிகள் இந்திய வங்கிகளில் வாங்கித் திருப்பிக்கட்டாத ரூ.ஒருலட்சத்துப் பதினான்காயிரம் கோடி ரூபாயை மீட்க எதிர்க்கட்சிகள் வைத்த கோரிக்கை என்னாச்சு? (http://www.dinamalar.com/news_detail.asp?id=1452271)  இதன் மொத்தத் தொகை ரூ.14லட்சம் கோடி என்று எதிர்க்கட்சிகள் தெரிவித்தனவே? அதுவும் இன்னார் இவ்வளவு என்று புள்ளிவிவரமும் தந்து, இதன்மீது நடவடிக்கை எடுக்க ஏன் தாமதம் என்று உச்சநீதி மன்றமே கேட்டதே? (நமக்குத் தெரிந்து ஒன்பதாயிரம் கோடியோடு ஓடிப்போன விஜய் மல்லையா இங்கிலாந்தில் தடபுடலாக இருப்பது ஊரறிந்த ரகசியம்தானே?) இதன்மீதெல்லாம் நடவடிக்கை எடுத்து இந்திய மக்கள் பணத்தை மீட்டிருந்தால் இந்த உங்கள் நடவடிக்கை பாராட்டுக்கு உரியதாக இருந்திருக்கும். இப்ப சந்தேகம் வராதில்ல?

(4)  'கடந்த, 2000 - 2013 ஆண்டுகளுக்கு இடைப்பட்ட, 13 ஆண்டுகளில் வங்கிகளால் தள்ளுபடி செய்யப்பட்ட கடன் தொகை, 2.04 லட்சம் கோடி ரூபாய்” என்று இப்போது “சபாஷ்!” போடும் தினமலர் அப்போது கேட்டதே? எழுதியதே! அது உண்மையா? பொய்யா? பார்க்க -  

இதுஅப்போ -http://www.dinamalar.com/news_detail.asp?id=1599266

இது இப்போ - http://www.dinamalar.com/news_detail.asp?id=1644750 

(5)   சரி இப்ப நடுச்சாமத்தில நோட்டுகளைச் செல்லாதின்னு ஒரு சர்வாதிகாரியைப் போல மோடிஜி அறிவிக்கிறாரே, இதனால் எத்தனை கோடி கள்ளப்பணம் (கண்டுபிடிக்கப்பட்டு) அழிக்கப்பட்டது என்னும் விவரத்தையாவது அறிவிப்பாராமா? அட ராமா?

(6)  இரண்டு நாளில் வங்கியில் கணக்கில்லாத –ஏடிஎம் என்றால் என்னவென்றே தெரியாத- அப்பாவிப் பொதுமக்கள், ஏழைக் கூலி அன்றாடங்காய்ச்சிகள் எத்தனை கோடிப்பேர் பரிதவித்தார்கள் என்னும் விவரம் கொஞ்சம் கொஞ்சமாக வரும். வந்து என்ன? அவர்கள் இந்த அறிவிப்பால் எந்த லாபமும் பெறப்போவதில்லை என்பது மட்டும் சத்தியம், சத்தியம், சத்தியம்!

இந்தியாவில், ஏற்கெனவே, விடுதலைக்கு முன்னர் ஆங்கிலேயரால் 1938இல் வெளியிடப்பட்ட ரூ.10,000 நோட்டு, செல்லாது என்று 1946இல் ஆங்கில அரசே அறிவித்தது தான்!

பின்னரும், மொரார்ஜி தேசாய் பிரதமராக இருந்தபோது அறிவித்த ரூ.1,000 நோட்டை மீண்டும்  செல்லுமென்று வாஜ்பாயி கொண்டுவந்தார்... அப்பப்ப இது நடக்கும்!

2014இல் ஐ.மு.கூ.ஆட்சியில், 2005க்கு முன்னர் அச்சிட்ட ரூ.500, 1,000 நோட்டு செல்லாதென்று அறிவித்து புதிய நோட்டுகளை வெளியிடப்பட்டது.

இந்த செல்லாத அறிவிப்புகள் எல்லாம் கள்ளப்பணத்தை, கருப்புப் பணத்தைக் கண்டுபிடிக்க, முடக்க, அழிக்க, என்றே முழங்கினர்!

ஆனால், கள்ளப்பணமும், கருப்புப்பணமும் இத்தனை ஆண்டுகள் கழித்தும், இன்னும் லட்சக்கணக்கான ரூபாய்களில் இந்தியா முழுவதும் புழக்கத்தில் இருந்துகொண்டுதானே இருக்கிறது இந்தியா முழுவதும்!

(தெரியாதவர்களுக்காக – கள்ளப்பணம் என்பது அரசு அனுமதி பெறாமல் தனியாரே அச்சிட்ட பணம்,இவர்கள் ரெட்டிப்பாக்கித் தருவதாக சாதாரண மக்களைத்தான் ஏமாற்றுவார்கள், வங்கியிலும் இது கலப்பதுண்டு!

கருப்புப் பணமென்பது, தனியார் வருமானக் கணக்கில் காட்டாமல் அரசாங்கத்தை ஏமாற்றி வைத்திருக்கும் பெரும் பணக்காரர்களின் மிகைப் பணம்!இது பெரும்பாலும் தங்க, வைரக் கணக்கில்தான் இருக்கும் 

“ஏழையான பணக்காரர்கள்” மட்டும்தான் ரொக்கமாக வைத்திருப்பார்கள் அல்லது அரசியல் வாதிகள் அவ்வப்போது செய்யும் தேர்தல் “செலவு”க்கு மாற்றி “சில்லறையாக” சிலபல கோடி வைத்திருப்பர்!)

ஆனால், இந்தா நாளைமுதல் வரவிருக்கும் ரூ.1000 மற்றும் 5,000பணத்தைக் கண்டெயினரில் கட்டுக் கட்டாக ஏற்றுவதைத் தடுக்க ஏதும் திட்டமுண்டா? அல்லது, ஏற்கெனவே கணக்கில் காட்டாமல் இருப்பவர் பணத்தைப் பிடுங்கத் திட்டமுண்டா?

அல்லது, வருமானத்திற்கு அதிகமாகச் சொத்துச் சேர்த்தவரின் சொத்துகளைப் பறிமுதல் செய்து அரசுக் கருவூலத்தில் சேர்க்கத் திட்டமுண்டா?

என்ன திட்டமுள்ளது? இப்படி எதுவுமில்லாமல்...

இந்த இரண்டுநாளாக தேசபக்தி பொங்க பேட்டி கொடுத்த அப்பாவிகள் உட்பட, ஏராளமான ஏழைகள் சில்லறை தேடி அலைந்ததுதான் மிச்சம்!

“பூசணிக்கா போறது தெரியாதாம்? கடுகு போறதப் பத்தியே கவலப்பட்டானாம்” இது எப்படி இருக்கு?

எனவே, மோடிஜியின் இந்த (மோடி?) வித்தையால் மக்களுக்கு எந்த நன்மையும் கிடைக்கப்பபோவதில்லை என்பது மட்டுமல்ல.. அதிரடியாக ஊழலை ஒழிக்கப்புறப்பட்ட அவதார புருஷர் என்பதான இமேஜூம் கிடைக்கும்.. எப்புடீ? தூங்குறவங்க இருக்குற வரைக்கும் தொடையில மட்டுமில்ல தலையிலேயே கயிறு திரிக்கிறவனும் இருக்கத்தான் செய்வான்...

----------------------------------------------------------------------------------------

இதுலயும் ஒரு காமெடி பாருங்க…

“கறுப்பு பணம் கண்டுபிடிக்கப்படும் :

பஞ்சாங்கத்தில் முன்கூட்டியே கணிப்பு”

பார்க்க- http://www.padasalai.net/2016/11/blog-post_490.html

அடடா! இந்தப் புண்ணியவான்கள் சுனாமியையும் முன்கூட்டியே சொல்லியிருந்தால் பல்லாயிரம் அப்பாவி மக்கள் அநியாயமாகச் செத்துப்போனதையும், ஆயிரக்கணக்கான பச்சிளம் குழந்தைகள் அனாதையானதைம் அப்பவே தடுத்திருக்கலாம்ல…?

அடப் போங்கப்பா… முடியல..

------------------------------------------------------------------------------- 
இது கடைசியா  நம்ம பஞ்ச்...

பிச்சைக்காரர் நம்மைப் பார்த்து, “ஐயா..அஞ்சுரூபா பத்துரூபா இருந்தாக் குடுங்க சாமீ!!” என்று கேட்டது போன வாரம்!
இந்தவாரம் -- 
நாம தான் அவரைப் பாத்து “ஐயா பிச்சைக்காரரே! 5ரூ, 10ரூ, 100ரூபா இருந்தாக் குடுங்கய்யா”னு கேக்கிற நிலை!
இதுதான் நம்ம மோடி(ஜி) வித்தையோ?!
------------------------------------------------------------------------------