சன் டி.வி.யின் பேய்க் காமெடிகள்!

சன் டி.வி.யின் பேய்க் காமெடிகள்!

இன்றிரவு 10 மணிக்கு மேல் தொலைக்காட்சியைப் பார்த்து பயந்தே போய்விட்டேன்... 

அதுவும் சன் தொலைக்காட்சியில்
ஞாயிறு விடுமுறையில்
வந்த பைரவீ...!
பாவிகளுக்குப் பிரியமானவள்! 
மன்னிக்கவும்
ஆவிகளுக்குப் பிரியமானவள்!

நான் பயந்தது 
பேயைப் பார்த்தல்ல.. 

பேயே பயந்து பேய்  
அடச்சே..
பேயே பயந்து போய்
பேய் அலறல் அலறியதைப் பார்த்துத்தான்!

பேய்கள் இளம்பெண்ணாக வெள்ளைச் சீருடையில் வந்து காமெடி பண்ணும் என்பது தெரிந்தது தானே? (பள்ளிக் கூடத்துப் பசங்க கூட சனிக்கிழமையில் சிறப்பு வகுப்பு வைக்கும் நல்ல ஆசிரியர் சிலரிடம் கெஞ்சிக் கூத்தாடி கலர்-டிரஸ் போட அனுமதி வாங்கி விடுகிறார்கள்... ஆனால் பாவம்... இந்த இளம் பேய்களுக்கு “அன்-யூனிஃபாமில்“ வர எந்தக் காலத்திலும் அனுமதியே கிடையாது போல! எப்பப் பாரு வெள்ளைச் சீருடைதானா? மாத்துங்கப்பா!)

கொலை செய்யப் பட்ட பெண், தன்னைச் சீரழித்துக் கொலை செய்தவர்களை மீண்டும் வந்து படுகொலை செய்வது அனைத்துத் தொலைக்காட்சி மற்றும் திரைப்படப்“பைரவி”கதைகளில் வழக்கம்தானே?

நா இந்த எழவெல்லாம் பாக்குறதில்லன்னாலும்...
பேரறிஞர் முத்துநிலவனே பாக்கலங்குறதுக்காக நம்ம தமிழ்நாட்டுப் பாமர மக்கள் பாக்காமயா இருக்காங்க(?)
அவுங்க பாக்குற எல்லாத்தையும் என்னதான் பாக்குறாங்க னு நாமளும் பாத்துத்தானே தொலைக்க வேண்டியிருக்கு? 
மத்தபடி இந்த பைரவியில நடிக்கிறது யாரு? இயக்குநர் யாரு ன்னெல்லாம் நமக்குத் தெரியாதுப்பா..

அந்த அழகான பேய் மட்டும் அப்பப்ப வேற வேற அழகான பொண்ணுங்களா மாறிக்கிட்டே இருக்கும்.. அட ஆமா பின்ன பேய்க்கும் போரடிக்காதா என்ன? என்ன நம்ம மாதிரி தாலிகட்டியா குடும்பம் நடத்துது இந்தப் பேய்க..? சரிசரி..

ஆனா..
நமது காவல் மற்றும், நீதித்துறைக்காரர்கள் தங்கள் வேலை போகாமல் இருப்பதற்கு நம்ம பேய்களிடம் கொஞ்சம் நன்றி விசுவாசமா இருங்கப்பா.... 
ஏன்”னா...மற்ற பேய்கள் எல்லாம் தன்னைக் கொன்றவர்களை இவர்கள் கண்டுபிடித்துத் தண்டிக்கட்டும் என்று பெரியமனது பண்ணி விட்டுவிடுவதால் தானே இவர்களுக்கு வேலை கிடைக்கிறது?!!? இல்லன்னா.. அதுபாட்டுக்குப் பேய்களெல்லாம் தீர்மானம் போட்டுக் கிளம்பி, தன்னைக் கொன்றவர்களை எல்லாம் 

தாங்களே பேய் ச்சே.. போய் கொன்றுவிட்டால் இந்தக் காவல்துறையும், நீதித் துறையும் வேலையில்லாத் துறைகளாகிக் களைக்கப்பட்டு விடுமல்லவா? 

சரி நம்ம விஷயத்துக்கு வருவோம்..

தன்னைக் கொன்றவனை வேறொரு பெண் உடலில் புகுந்துகொண்டு கொல்ல வரும் அந்தப் பேய் அவன் கழுத்தைப் பிடித்து விடுகிறது

நெறிக்கிறது... 
நெறிக்க்க்க்க்கிகிறது! நெறிக்க்க்க்க்க்க்க்க்கிறது! முழிபிதுங்கிக் துடிதுடித்து, 
கொலைகாரன் சாகப்போவதை ரசிக்க 

நாமும் தயாராகிவிட்டோம்... 

டொட்டாய்ங்.. டொடாய்ங் டொண்டடாய்ங்.. 
டொட்டாய்ங்.. டொடாய்ங் டொண்டடாய்ங்.. எனத் தொடரும் பின்னணி இசையில் 
நம்ம மயிர்க்கால் எல்லாம் கிளம்பி 

சும்மா டொடாய்ங்னு நட்டுக்கிச்சுல்ல? 

இருக்காதா பின்ன? விஷூவல் எஃபக்டுல்ல? 

(காதலிக்க நேரமில்லை படத்துல
 நாகேஷ் 
கதை சொல்லும்போது பாலையா குடுத்த விஷூவல் எஃபக்ட்ட நினைச்சிக்குங்க...

ராத்திரி 10மணிக்கு மேல 
தமிழ் நாடே இப்ப பாலையா ஆகிடுதுல்ல.. 

இருக்காதா பின்ன? விஷூவல் எஃபக்டுல்ல?)

அட அப்பப் பாருங்க... 

நம்ம கொலைகாரன் கழுத்தை 

நெறித்துக் கொண்டு ஆங்காரம் காட்டிய 

சீருடைப் பேயிடமிருந்து 

“ஐயோ..“ என அலறல்!

நமக்குத் தூக்கி வாரிப்போட்டது... 

எப்பவும் பேயப் பாத்து 

மத்தவங்க தானே அலறுவாங்க... 

இங்க என்ன பேயே அலறுது னு 

எனக்கே பயமாப் போச்சு!

அட ஆமாங்க.. 

பேயே பேய்அலறல் அலறினா !!!!!

நமக்குப் பயமா இருக்காதா?

சரி என்னதான் நடக்குதுன்னு பாத்தா... 
பேயின் கையில் நெருப்புப் பட்டது மாதரி வேக்காடு.. எரிச்சல் தாங்காம பேய் பேயலறல்...போடுது!... 

“ஐயோ! என் கையெல்லாம் எரியுதே!..
நெருப்பாக் கொதிக்குதே! ஐயோ ஐயய்யய்யோ“ இது என்னடாது...திடீர்னு இந்தப் பேய “சம்சாரம் அது மின்சாரம்“ படத்துல நம்ம ஆச்சி மனோரமா விசுவிடம் வசனத்தை மாத்திப் பேசிட்டு உலறல் அலறல் அலறுவாங்களே அதுமாதிரி அலறுதேனு பாத்தா... அடி ஆத்தா...

அந்தக் கொலைகாரனின் கழுத்துல 

மந்திரிச்சுக் கட்டுன ஆத்தாத் தகடு!

தகடு! தகடு! னு சத்யராஜ் பாணியில சொல்லிக்குங்க...

“ஐயோ! என்னை விடு”ன்னு முந்திக் கத்தின பொண்ணு இப்ப இவனையே அந்த வசனத்தை ரிபீட் பண்ணவச்சது மாறி, மீண்டும் அந்தப் பெண்ணே கதற... கொலைகாரன் முழிச்சிக்கிட்டான்

“ஆகா....! ஆத்தா படம்போட்ட தகடு! நம்ம கழுத்துல தாலிமாதிரித் தொங்க விட்டு இருந்தம்ல்ல அதுதான் இந்தப் பேய் கைய எரிச்சுடுச்சு” னு சட்டுனு புரிஞ்சிக்கிட்டு,  அதக் கெட்டியாப் புடுச்சிக்கிட்டே எடுத்தான் பாரு ஓட்டம்!

ஆனா   அந்த  ஆத்தாத் தகடு டச்சுல எரிஞ்ச கையின் வேதனை தாங்காமெ அந்தப் பேய் அந்தப் பொண்ண அங்ஙனயே அம்போனு விட்டுட்டு சொய்ங்..னு அந்தப் பொண்ணு உடம்பிலர்ந்து கிளம்பிப் பேயி...அட..போயி.. 
ஒருவீட்டுல நிம்மதியாத் தூங்கிட்டிருந்த 
இன்னொருத்தன் உடம்புல பூந்துச்சா.. 

அவன் திடீர்னு எந்திரிச்சு 
“ஐயோ கை எரியுதே“னு ஒரே பேயலறல்... 
அட என்னங்கடா இது...? 
பேய்க்கு டைரக்டா அந்த எஃபக்ட் வரலயாம்! 
ஆனா அடுத்தவங்க உடம்புல 
பூந்தா மட்டும் எஃபக்ட் வந்து
எரிச்சல்ல கதறுமாம்.. எப்புடீ?
  
இந்தத் தகடுகள் பற்றி ஒரு பெரும் ஆய்வே நடத்தலாம்.. இது ஒரு குறியீடுதான்.. 
பாருங்க..பாருங்க.. பார்த்துக்கிட்டே இருங்க..
ஆனா கொஞ்சமும் யோசிச்சிடாதீங்க...

அட அறிவுக் கொழுந்துகளே!

சன் தொலைக்காட்சியின் 
பேய்க்காமெடிக்கு 

ஓர் அளவில்லயா சாமிகளே?

“ஆறறிவில் ஓரறிவு அவுட்டு – மிஞ்சும்

அஞ்சும்கூட இருக்குமின்னா 

அதுவும் கூட  டவுட்டு!” – பட்டுக்கோட்டையார்

இதனால்தான் என்னமாதிரி ரெண்டுங்கெட்டான் சிலர் சொல்கிறார்கள் --
“இரவு பத்துமணிக்குமேல் பேய்பிடிக்காத 
தொலைக்காட்சி நிகழ்ச்சிகளைப் பாருங்கள்...
வாராவாரமும் சோதிடம் வெளியிடாத 
பத்திரிகைகளாப் பார்த்து
வாங்குங்கள் வாசியுங்கள்” -என்று

தந்தை பெரியார் வளர்த்த 

பகுத்தறிவுப் பாரம்பரியம் என்ன?

அதில் வளர்ந்தவர்கள் வளர்த்த 

சன் டிவியின் பேய்க் காமெடிகள் என்ன?

நம்ம மக்களை என்ன சொல்ல...
“நெஞ்சு பொறுக்குதில்லையே..“ என்ற பாரதிக்கு

வயது 133!
வழிபட எதையாவது யாரையாவது

தேடி அலைகிறார்கள்..!
‘உன்னைக் கும்பிட்டு விழவா?’ என்று

சிலைகளிடத்தில் மட்டுமல்ல
சில களைகளிடத்திலும் கேட்டுக்

கூழைக்கும்பிடு போட்டுக்

கேட்டுக்கொண்டே நிற்கிறார்கள்.. நிமிராமலே..

“என்று மடியும் எங்கள் அடிமையின் மோகம்?”
ஒருபக்கம் கோபமாகவும்,
மறுபக்கம் பாவமாகவும் இருக்கிறது... 
என்ன செய்ய? சிரிச்சித்தான் ஆத்தணும்.

வேறென்ன சொல்ல?

------------------------------------------------