தமிழ்இனிது-18- (அய்யாவும் மய்யமும் - இந்து தமிழ் நாளிதழ்)

( நன்றி - இந்து தமிழ் - திசைகாட்டி -10-10-2023 )

நண்பர் ஒருவர், “ஐயா, அய்யா  இரண்டில் எது சரி?, கமல் கட்சியில் ‘மய்யம்’ என்பது சரியா? ‘மையம்’தானே சரி?” என்று கேட்டார்.

 ‘ஐயா’வில் உள்ள ‘ஐ’ எழுத்தை, அதற்குரிய இரண்டு மாத்திரை அளவுக்கு அழுத்தி உச்சரிக்காமல், ஒன்றரை மாத்திரை அளவில் ‘அய்யா’ என்றே பேசுகிறோம். அதுபோலவே, ‘சமையல்’, ‘சமயல்’ ஆகிறது. ‘மழை பெய்கிறது’ என்பதை, ‘மழ பெய்யுது’ என்றே சொல்கிறோம்.   

 இதை ‘ஐகாரக் குறுக்கம்’ என்று இலக்கணம் சொல்கிறது.  அதாவது, ‘ஐ’ எனும் இரண்டு மாத்திரை, தன் ஓசையில் குறுகுவது!

‘தற்சுட்டு அளபு ஒழி ஐ, மூவழியும் நையும்’ - நன்னூல்-95.  கை, பை, எனவரும் ஓரெழுத்து ஒருமொழி தவிர்த்து, தொடரில் வரும் ‘ஐ’யை, 2மாத்திரைக்கு உச்சரிப்பதில்லை. ‘ஐ’ முதலில் வந்து ‘ஐயா’, ‘அய்யா’ ஆகிறது! இடையில் வந்து, ‘உடைமை’- ‘உடமை’ ஆகிறது, இறுதியில் வந்து ‘தவளை’ , ‘தவள’ ஆகிறது. 

இதுபற்றித் தொல்காப்பியரிடம் கேட்டால், ‘அகர இகரம் ஐகாரம் ஆகும்’ (தொல்-நூற்பா எண்-54) என்று,  ‘ஐ’, ‘அய்’ இரண்டையுமே பயன் படுத்தச் சொல்லி, வியக்க வைக்கிறார்!   

மீண்டும், ‘விளிமரபு’ இயலில், ‘ஐ ஆய் ஆகும்’  என்கிறார் (தொல்-606). ‘அன்னை’ என ஐகாரத்தில் முடியும் சொல், விளி(அழைப்பு) ஏற்கும்போது ‘அன்னையே’ என்று ஆவது போல, ‘அன்னாய்’ என்றும் வரும் (கலித்தொகை-51). ஆக, ‘ஐ’-‘அய்’ என வருவது புதிதல்ல! பழந்தமிழில், ‘கை’யை, ‘கய்’என்றே சொல்கின்றன சிந்தா மணியும் (கய்தரு மணி) கம்ப ராமாயணமும் (கய்யொடும் இற்று).      

இன்றும் கிராமக் காவல் தெய்வமாக ‘அய்யனார்’ இருக்கிறார்! ‘ஐயப்பன்’ ‘அய்யப்பன் இருவரும் ஒருவரே! ஆக, ‘ஐயா’, ‘அய்யா’ இரண்டும் சரிதான். கமல், ‘மய்யம்’ என்பதும் சரிதான்.    

உடனே, ‘தமிழில் ‘ஐ’ எனும் உயிர் எழுத்தே வேண்டாமா?’ எனில், ‘ஐ’ இருக்கும். இரண்டும் கெட்டானாக, ‘ஐய்யா’ என்பதுதான் இருக்கக் கூடாது! அதோடு, ‘அய்’ என்பதே தவறு என்றும் சொல்ல வேண்டாம்!   

இதன் தொடர்ச்சியாக, ‘கலைஞரை, கலய்ஞர் என்றல்லவா எழுத நேரும்?’ எனில், ஆம்! ஆனால், ‘ஒரே மூச்சில் ஒன்பது படி தாண்டக் கூடாது’ என்றே எழுத்துத் சீர்திருத்தர் வலியுறுத்தவில்லை என்று நினைக்கிறேன்.

வள்ளுவர் குறளில், ‘ஔ’ எழுத்தையே பயன் படுத்தவில்லை! ‘ஔ’ வந்த இரண்டு குறளிலும் (167,169) ‘அவ்’ என்றே சொல்கிறார்! ‘ஐ’, ‘அய்’ ஆவதற்கும் ‘ஔ’, ‘அவ்’ ஆவதற்கும் தொடர்புண்டோ?

மறுபக்கம், மற்ற உயிரெழுத்துகள் போலன்றி, ‘ஐ’ ‘ஔ’ இரண்டு எழுத்து மட்டும் கூட்டெழுத்தாக உள்ளதையும் ஆய்வு  செய்ய வேண்டும்.   

“இலக்கணமும் சமூக உறவுகளும்” என்றொரு சிறு ஆய்வு நூலை, ஈழத் தமிழறிஞர் கா.சிவத்தம்பி எழுதியிருக்கிறார். அதன்படி பார்த்தால், ‘தோழரே’, ‘உடன்பிறப்பே’, ‘ரத்தத்தின் ரத்தமே’, ‘ஜீ’ என்று, அவரவர் சார்பை அடையாளப் படுத்துவது போல, பெரியார் கருத்துகளை ஏற்றுக் கொள்வோர், ‘ஐயா’வைப் பெரும்பாலும் ‘அய்யா’ என்றே எழுதுகிறார்கள் என்பதும் உண்மை தான் ! “மய்யம்” கமலும் அப்படித்தான் போல!    

--------------------------------------------------------------------- 

தமிழ்இனிது-தொடர்16, 17

 தமிழ் இனிது-16     

 (நன்றி -இந்து தமிழ் நாளிதழ் 
26-9-2023 செவ்வாய் )
உளமார / மனமாற வாழ்த்தலாமா?!

மனம், குளம், மரம்  
        இவை போலும் சொற்கள் தொடரில் வரும்போது, ‘அத்து’ எனும் பகுபத உறுப்பு (சாரியை) சேர்ந்து, ‘மனத்தில் நினைத்தேன்’, ‘குளத்தில் குளித்தேன்’, ‘மரத்தில் ஏறினேன்’ என்று மாறுவது மரபு. எனினும் ஏனோ, ‘மனம்’ மாறி(?) ‘மனதில்’ என்று பேசுவது பழக்கமாகி, பிறகு அதுவும் தொடர்ந்து வழக்கமாகி, எழுத்திலும் வந்துவிட்டது! பாரதி, “மனதில் உறுதி வேண்டும்” என்றே பாடுகிறார். மனத்தில் என்பது மனதில் என்றானதற்காக, ‘குளதில்’ குளிக்க முடியாது! ‘மரதில்‘ ஏறவும் கூடாது!  அப்படியான வழக்குகள், தமிழில் இல்லை! ஆனால், இங்கே பேச்சு வழக்கில் உள்ள ‘மனசு’, “மனசில் ஆயோ?” என்று மலையாள வழக்கிலும் உள்ளதை, ஒப்பாய்வு செய்யலாம்.    

தமயன் - தமையன்-

   தம்+ஐயன்= தமையன் (தமக்கு மூத்த, பெரியவன்),  தம்+அக்கை=தமக்கை, தம்+பின்= தம்பி (தமக்குப் பின் பிறந்தவன்), தம்+கை= தங்கை (தமக்கு இளையவள், சிறியவள்), கை எனும் சொல், சிறிய என்றும் ஒரு பொருள்தரும்! கைப் பை, கைக் கடிகாரம், கைப் பேசி என்பன கையில் இருப்பதால் மட்டுமின்றி கைக்கு அடக்கமான அளவில் சிறியதாய் இருப்பதாலுமே  இப்பெயர் பெற்றன என்பது இன்னொரு தமிழ் நுட்பம்!  

அடமானம் - அடைமானம் - 

   ‘மானத்தை அடகு வைப்பது’ என்னும் பொருளில் வரும் இந்தச் சொல்லின் பண்பாட்டுச் சிறப்பைப் பாருங்கள்! சொந்தக் காலில் நிற்க வேண்டுமே அன்றி, கடனாகக் கூட “ஏற்பது இகழ்ச்சி” எனும் சுயமரியாதை இதற்குள் கிடக்கிறது! அடகு வைப்பது சொத்தை அல்ல,  தன்மானத்தையாம்! பேச்சு வழக்கில் அடைமானம் அடமானம் என, ஐ எனும் நெடில், அ என குறில் ஓசை பெறுவது ஐகாரக் குறுக்கம். ஆனால்,  எழுதும்போது ஐ சேர்த்து எழுதுவதே மரபு. அதாவது, எழுதும்போது பழைமை, உடைமை, புடைவை, தமையன், ஏழைமை, அடைமானம் என எழுதுவதை, பேச்சு வழக்கில் பழமை, உடமை, புடவை, தமயன், ஏழமை, அடமானம் என்றே சொல்கிறோம்.  எனினும் பேச்சு மொழியை எழுத்து மொழியில் எழுதுவது வழக்கமாகி வரும்போது, இந்த  எழுத்து மரபை  அறிந்திருப்பதும் அவசியம்.

உளமாற – உளமார?  

   நண்பர்கள் ஆரத் தழுவிக் கொள்வதும், வாயார வாழ்த்துவதும், உளமாரப் புகழ்வதும், வயிறார உண்பது சரிதான். இதை மனமாற என்றால், மனம் மாற என்னும் தவறான பொருள் தந்துவிடும்.

வான வேடிக்கை – சரியா?  

    வானத்தில்  நடப்பதால்   வானவேடிக்கை ஆகிவிடாது! வானமா வேடிக்கை காட்டுகிறது? வானத்தில் நாம்தானே வேடிக்கை காட்டுகிறோம்? வாணம் என்றால் வண்ணவெடிச் சரம். எனவே ‘வாண வேடிக்கை’ என்பதே சரி. ‘புஸ்வாணம்’ என்பது வெடிக்காமலே ‘புஸ்‘ என ஒலி-ஒளியைத் தருவதால் வந்த பெயர். இதை, ‘எதிர்பார்த்தது நடக்காத’ போது, கிண்டலாக, ‘புஸ்வாணம் ஆயிருச்சு!’ என்னும் வழக்கில் கேட்கலாம்.

வீடு கட்ட, பூமியைத் தோண்டுவதையும் ‘வானம் தோண்டுவது’ என்னும் வழக்கு வியப்பானதுதான்! ‘மதுரையில் ‘மெஜுரா மில்’ கட்ட வானம் தோண்டிய போது ரோம நாணயங்கள் கிடைத்தன!’ என்பது, சொல்லாலும் பொருளாலும் வியப்பூட்டும் தமிழ் நுட்பம்! 

 --------------------------------------------

 தமிழ் இனிது     (17)                      

(நன்றி - இந்து தமிழ் -03-10-2023 - செவ்வாய் ) 
------------------------------------------------------------------- 
 'அண்ணா'வை   கைவிடலாமா?

சொற்களைப் புரிந்து கொள்ள, நேரடியாக அகர முதலி -Dictionary- யில் தேடுவதை விடவும், சூழலுடன் அச் சொல்லைப் பொருத்திப் பார்க்கும் போதுதான் தெளிவு கிடைக்கும்.

மேல்நாடும், கீழத்தெருவும் –   

தமிழ் வழக்கில், “மேல்நாடு” என்பதை, மேற்குலக நாடு என்றே புரிந்து கொள்கிறோம். சிலருக்கு, “மேற்கில் உள்ள நாடா, மேலான நாடா?” என்று சந்தேகம் வருவதும் இயல்பு. தமிழில் மேற்கு கிழக்கு என்பன திசைகளைக் குறித்தாலும், உயர்ந்த, தாழ்ந்த என்றும் பொருள் உண்டு! தமிழ்நாட்டின் மேற்கில், உயரமான மேற்கு மலைத்தொடரும், கிழக்கில், தாழ்வான நிலப்பகுதிகளும் இருப்பதிலிருந்து இக்கருத்து வந்திருந்தாலும், சமூக ஏற்றத்தாழ்வைக் குறிப்பதும் ஆய்வுக்குரியது.  (குறள்-973). பெரும்பாலான சேரிப் பகுதிகள், ஊருக்குக் கிழக்கிலேயே இருப்பதைச் சிந்தித்தால் இது விளங்கும். “சிந்துவெளி நகரங்களின் மேல்-மேற்கு, கீழ்-கிழக்கு இருமைத் தன்மை” என்று, இதுபற்றி ஒரு அத்தியாயமே எழுதுகிறார் “ஒரு பண்பாட்டின்  பயணம்” எனும் பெருநூலின் ஆசிரியர், திரு ஆர்.பாலகிருஷ்ணன் இ.ஆ.ப., இந்தக் கருத்து வியப்புக்கு மட்டுமல்ல சமூகவியல் ஆய்வுக்கும் உரியது.

எல்லாரும், நல்லோரும்

            இலக்கிய வழக்கில் “எல்லோரும்“ என்னும் சொல், பேச்சு வழக்கில் “எல்லாரும்“ என்றே வருகிறது. “எல்லாரும் ஓர் விலை” - பாரதி பாடல், சில பதிப்புகளில் “எல்லோரும்” என்றும் அச்சாகியுள்ளது! “எல்லார்க்கும் நன்றாம் பணிதல்”-குறள்-125. இதேபோல, “நல்லாரைக் காண்பதுவும் நன்றே” என்கிறார் ஔவை. இதற்குத் தொல்காப்பியரும் “ஆ ஓ ஆகும்.. …செய்யுள் உள்ளே”–“அதாவது, நல்லார் என்பது நல்லோர் என்றும் வரும்” - என்று ஒப்புதல் தருகிறார் (தொல்-680). எனவே,  இரண்டு சொற்களில் ஏதேனும் ஒன்றை ஓசைக்கேற்பப் பயன்படுத்தலாம்.  

  மூத்த சகோதரர் எதற்கு?

            பிறமொழிச் சொற்களைக் கடன் வாங்கலாம், பிறநாட்டவரின் கண்டுபிடிப்புகளை, அறிவியல் தொழில் நுட்ப வளர்ச்சியை நாம் பயன் படுத்தும் போது, அவர்களின் சொற்களைப் பயன்படுத்துவதும் இயல்பே. ஆனால், அந்தச் சொற்களில் தமிழ் மரபின் கவனமும் தேவை.

             ‘அண்ணன்’ எனும் ஒற்றை உறவுச்சொல் ஆங்கிலத்தில் இல்லை. அதில் ‘Elder Brother’ தான். அதற்காக ஆங்கில வழியில்  ‘மூத்த சகோதரர்’ என்று தமிழைப் படுத்தலாமா? அண்ணன் என்னாவது? waterfalls-ஐ  ‘நீர்வீழ்ச்சி’ என்றால் ஏற்கெனவே இங்கிருக்கும் அழகு தமிழ் ‘அருவி’ வருத்தப்படாதா? இவைபோலும் சொற்களில் மிகுந்த கவனம் தேவை! ஆடம்பரத்திற்காகக் கடன் வாங்கினால் வாழ்க்கை சீரழியும், அலட்சியமாகச்  சொற்களைக் கடன்வாங்கினால் தமிழும் சீர்குலையும்.   

காந்தீயமா? மார்க்சியமா?   

காந்திய வாதிகள் தீயவற்றைப் பார்க்க, பேச, கேட்க வேண்டாம் என்று மூன்று குரங்குகள் உணர்த்தும். இருந்தும் சிலர் “காந்தீயம்” என்று எழுதுகிறார்கள், இது தவறு. “இசம்“ (ism) எனும் ஆங்கிலச் சொல்லின் தமிழாக்கம்தான் “இயம்”என்பது. இதன்படிப் பார்த்தால் காந்தியம், மார்க்சியம், பெரியாரியம், அம்பேத்கரியம், என்பனவே பொருத்தமான சொற்கள். இதே போல, பாசிசம், நாசிசம், என்கிறார்கள்! தமிழ் மரபின்படி ‘பாசியம்’, ‘நாசியம்’ என்றல்லவா எழுத வேண்டும்?! சர்வாதிகாரத்தைத் தமிழ் விரும்பவில்லை போலும்! குறள்-அதிகாரத்தை ஏற்கும் தமிழ், சர்வ-அதிகாரத்தை ஏற்பதில்லை என்றே தோன்றுகிறது. இதுதான் தமிழ் அறம்! ஏனெனில் தமிழ் இனிது! 


------------------------------------------------------------------ 

 நமது “தமிழ் இனிது” தொடர் பற்றி,

03-10-2023 - காலை “கலைஞர் தொலைக்காட்சி” 

“ஒன்றே சொல் நன்றே சொல்” பகுதியில் பேசிய  

அண்ணன் சுப.வீரபாண்டியன் அவர்கள்,

மனம் திறந்து வாழ்த்தி, பாராட்டினார்கள்.

4-நிமிடம் கடந்த அவர்களது உரையைப் பெற்று

பதிவிட முயல்கிறேன்.

(நண்பர்கள், கிடைத்தாலும் அனுப்பலாம்)

-------------------------------------

ஆர்.பாலகிருஷ்ணன் அவர்களின் “ஒரு பண்பாட்டின் பயணம் - சிந்துமுதல் வைகை வரை” நூல் அறிமுக விழா (முழுமையான உரைகள் காணொலி இணைப்பு)

 



“ஒரு பண்பாட்டின் பயணம் - சிந்து முதல் வைகை வரை”
நூலாசிரியர் திருமிகு ஆர்.பாலகிருஷ்ணன் அவர்களுக்கு 
நினைவுப் பரிசு வழங்குபவர் மாவட்டத் தலைவர்
ராசி.பன்னீர் செல்வம். இடமிருந்து வலமாக மாநிலத் தலைவர் மதுக்கூர் இராமலிங்கம், மாவட்டச் செயலர் ஸ்டாலின் சரவணன், எழுத்தாளர் ச.தமிழ்ச்செல்வன், மாநிலத் துணைத்தலைவர் நா.முத்துநிலவன், மாநிலச் செயலர் ஸ்ரீரசா, மாவட்டப் பொருளர் எழுத்தாளர் ஜெயபாலன்,       மாநிலக் குழு உறுப்பினர் கவிஞர் தனிக்கொடி ஆகியோர்                     
உடன் உள்ளனர். 
------------------------------------------------------ 



            ஆர்வம் மிகுந்த வாசகர்கள், கலந்துரையாடலில் பங்கேற்றோர்-



                        காணொலிகள் இணைப்புகள்

சிந்துவெளி ஆய்வாளர்

திருமிகு ஆர்.பாலகிருஷ்ணன் இஆப., 

ஒருமணி நேர உரையாடல்


-------------------------------------------------------- 

தமுஎகச மேனாள் மாநிலத் தலைவர்

எழுத்தாளர் ச.தமிழ்ச் செல்வன் அவர்கள் 

சிறப்புரை - 83நிமிடம்

https://youtu.be/QzPggnyWqyc?si=UxYKUsjESfmqfm44

-----------------------------------------------------------------

தமுஎகச மாநிலத் தலைவர் 

கவிஞர் மதுக்கூர் இராமலிங்கம் அவர்கள் 

வாழ்த்துரை - 15நிமிடம்

https://youtu.be/c9BVfiGU5O8?si=E2D285zCCBLmKHLD

----------------------------------------------------------------- 

தமுஎகச மாவட்டத் தலைவர்

எழுத்தாளர் ராசி.பன்னீர்செல்வன் 

தலைமை உரை - 12நிமிடம்

https://youtu.be/BPlTJLiFbpk?si=eur-eue9viPKMVrN   

----------------------------------------------------------------- 

தமுஎகச மாவட்டச் செயலர்

கவிஞர் ஸ்டாலின் சரவணன் 

வரவேற்புரை - 13நிமிடம்

 https://youtu.be/fDA0jx1XowM?si=Jqr_rUO5iHy3rYuE 

-----------------------------------------------------------------  

தமுஎகச மாநிலத் துணைத்தலைவர்

நா.முத்துநிலவன் 

தொடக்கவுரை- 14நிமிடம்

https://youtu.be/1XOZVbVjz7w?si=B2j8BlAKhUWiYs5n

---------------------------------------------- 

நிகழ்ச்சி ஏற்பாடு

தமிழ்நாடு முற்போக்கு எழுத்தாளர் கலைஞர்கள் சங்கம்,

புதுக்கோட்டை மாவட்டக் குழு.

காணொலி ஆக்கம்  -

கண்மணி கலை ஊடகம், புதுக்கோட்டை &

Reporters TV

--------------------------------------  

பொறியியல் வகுப்புத் தொடக்கவிழா - நா.முத்துநிலவன் உரை

வித்தியாசமான உழைப்பும் 
வேறுபட்ட சிந்தனையும் தேவை! 

பொறியியல் வகுப்புத் தொடக்கவிழாவில் 
நா.முத்துநிலவன் உரை 

புதுக்கோட்டை-செப்.12 கைக்குறிச்சி ஸ்ரீபாரதி மகளிர் பொறியியல் கல்லூரியில் பாரதி நினைவுநாளன்று -11-9-2023- நடந்த முதலாண்டு வகுப்புகள் தொடங்கி வைத்து, மாணவிகளிடம் உரையாற்றும்போது பேசிய கவிஞர் நா.முத்துநிலவன், “வெறும் உழைப்பால் பயனில்லை, வித்தியாசமான உழைப்புடன் கூடிய வேறுபட்ட சிந்தனையே இப்போதைய தேவை” என்று பேசினார் 
              பாரதி பொறியியல் கல்லூரியின் பதினைந்தாம் ஆண்டு நிகழ்வாக, முதலாண்டு பொறியியல் வகுப்புகளைத் தொடங்கி வைத்துப் பேசிய எழுத்தாளர் நா.முத்துநிலவன் மேலும் பேசியதாவது- “உழைப்பே உயர்வு தரும் என்பது உண்மைதான் என்றாலும், வெறும் கடின உழைப்பால் மட்டும் பலன் கிடைக்காது. வித்தியாசமான உழைப்போடு, வேறுபட்ட சிந்தனைகளும் சேரும்போதுதான் அதன் பலன் வீட்டுக்கும் நாட்டுக்கும் பயன் தரும். இன்று உலகம் முழுவதும் நம் நாட்டு இளைஞர்கள் உலகப் பெரும் நிறுவனங்களின் முக்கியமான பொறுப்புகளில் இருப்பதன் ரகசியம் இதுதான்! ஒரு நாட்டின் அடையாளமாக அந்த நாட்டின் பெருநகரக் கட்டுமான வளர்ச்சியே முன்னிற்கிறது. சிங்கப்பூர், அரபு நாடுகளின் அடையாளம் அங்குள்ள வானளாவிய கட்டடங்களே கண்ணையும் கருத்ததையும் கவர்ந்து நெஞ்சில் நிற்கின்றன. வளரும் நாடுகளில் இவை போலும் பெரும் கட்டுமானப் பணிகள் நிறைய உருவாகின்றன. 
        ஏட்டளவில் படித்துப் பட்டம் பெற்றால் அதற்குப் பலனிருக்காது. மாறாக, படிப்போடு, கற்பனை ஆற்றலையும் கலந்து புதிய புதிய மென்- பொருள்களை உருவாக்கி, “கற்பனையைக் கருவியாக்கி விற்பனை செய்த ஆற்றல்”தான் பில்கேட்ஸை உலகப் பணக்காரர் வரிசையில் பல ஆண்டுகள் உட்கார வைத்தது. இப்போதும் உலகம் முழுவதும் கணினி மென்பொருள் வன்பொருள் பொறியாளர்க்கான தேவை அதிகரித்துக் கொண்டே வருகிறது. வேலைக்குப் போன பிறகும் மக்களுக்கான பணிகளைத் தொடரும் யாரையும் மக்கள் மறப்பதில்லை. அப்துல் கலாம், கல்பனா சாவ்லா, தாமஸ் ஆல்வா எடிசன், கலிலியோ என மறைந்த பிறகும் வாழ்பவராக மக்கள் பயன்பாட்டுக்கான அறிவியலைக் கண்டுபிடித்துத் தந்தவர்கள் வாழ்ந்து கொண்டே இருக்கிறார்கள்.        
            பாரதியும் அப்படித்தான் “நான் வீழ்வேன் என நினைத்தாயோ?” என்று கேட்டதுபோல இந்த 103ஆவது நினைவு நாள் அன்றும் நினைக்கப் படுகிறான். தான்பெற்ற கல்வியால் வீடும், நாடும், உலகமும் பயனடையும்படி, இன்று தொடங்கும் உங்கள் கல்வி அமையவேண்டும் அதிலும் குறிப்பாகப் பெண்கள் படிப்பதே அவர்கள் வாழ்க்கையை முன்னேற்றும். பெற்றோர்கள் தம் பெண்களுக்கு வேறு சொத்து ஏதும் சேர்த்து வைக்க வேண்டியதில்லை, கல்வி தந்தால் அதுவே மிகப் பெரிய திருமணச் சீராக இருக்கும் எனவே இங்குள்ள பெற்றோரை இடையில் “பொருந்தி வருகிறது” என்று, படிப்பை முடிக்கும் முன்னரே திருமணம் செய்து, படிப்பை நிறுத்திவிட வேண்டாம் என்று கேட்டுக் கொள்கிறேன்” இவ்வாறு எழுத்தாளர் நா.முத்துநிலவன் உரையாற்றினார். 
        வகுப்புகள் தொடக்கவிழாவுக்கு, ஸ்ரீ பாரதி கல்விக் குழுமங்களின் தலைவர் குரு.தனசேகரன் தலைமை ஏற்றார். கல்லூரி முதல்வர் முனைவர் ச.திலகவதி வரவேற்புரையாற்றினார். தாளாளர் கனகராஜன், அறங்காவலர் கிருஷ்ண மூர்த்தி, பஷீர் முகமது வாழ்த்துரையாற்றினர். கல்லூரி மாணவியரின் கலை-நிகழ்ச்சி நடனமும் நடைபெற்றது. விழாவில் முதலாண்டு மாணவியர், அவர்களின் பெற்றோர் உட்பட சுமார் 400பேர் பங்கேற்றுச் சிறப்பித்தனர். நாட்டுப் பண்ணுடன் விழா நிறைவு பெற்றது. 
    மகாகவி பாரதியின் 103ஆம் ஆண்டு நினைவு நாளை முன்னிட்டு, கல்லூரி வளாகத்திலிருந்த பாரதியின் உருவச் சிலைக்கு கல்லூரித் தலைவர், தாளாளர்கள், முதல்வர்கள், பணியாளர்கள், மாணவியர் முன்னிலையில் எழுத்தாளர் நா.முத்துநிலவன் மாலை அணிவித்து மரியாதை செலுத்தி அஞ்சலி செலுத்தியபின் விழா தொடங்கியது. 
------------------------------------------------ 




நன்றி - தீக்கதிர் நாளிதழ் -12-9-2023


புகைப்படங்கள் - நன்றி அருண் ஸ்டுடியோ, புதுக்கோட்டை


நன்றி - புதுகை வரலாறு நாளிதழ் -13-9-2023

நினைவா? நனவா?! - தமிழ் இந்து -தொடர் கட்டுரை-15


நன்றி - தமிழ் இந்து -12-9-2023 
--------------------------------------------------- 
”உங்கள் சொந்த வீடு கட்டும் கனவு, இந்த ஆண்டு நினைவாகும்” என்று சோதிடம் சொல்கிறார்கள்! சொல்லாலும் தவறான விளம்பரம் இது! நிறைவேறாத கனவு தானே நினைவாக இருக்கும்? தமிழறிஞர் பெருமாள் முருகன், 02-01-2023 நாளிட்ட தனது வலைப்பதிவில், “கற்பனையானது  கனவு; உண்மை நனவு”  என்கிறார். கனவு நனவாக வேண்டும் என்பதே சரி.

ஓட்டுநர், நடத்துநர் - “போக்குவரத்துக் கழகத்தில் ஓட்டுநர், நடத்துநர்  பணியிடங்களை நிரப்ப முடிவு” என்ற அறிவிப்பை ஊடகங்கள் சரியாகவே வெளியிட்டிருந்தாலும், மாலைச் செய்தித்தாள் ஒன்று, ‘ஓட்டுனர்’ ‘நடத்துனர்’ என்றே வெளியிட்டிருந்தது.  இந்தக் குழப்பம் பலருக்கும் இருக்கிறது.   

‘பொருநர் ஆற்றுப்படை’ சங்க நூல்களில் ஒன்று. செருநர்-குறள்-759. தொழிற்பெயர் (நடத்துதல்), பெயர்ச்சொல் (நடத்தும் ஒருவர்) ஆகி, கட்டளை (நடத்து) ஏற்கும் போது,  நடத்துநர் என வரும். அனுப்புதல்-அனுப்புநர், ஆளுதல்-ஆளுநர் என்பன சரி. வந்தனர், போயினரில் வரும் அர் விகுதி வேறு.  ஓட்டுனர், ஆளுனரில் வரும் அர்/னர் விகுதி பொருத்தமற்றது. பொருத்தம், மரபு அற்றவற்றைத் தொடர்வது மொழியைச் சிதைத்து விடும். அனுப்புநர், பெறுநர், இயக்குநர், ஆளுநர், நடத்துநர், ஓட்டுநர்  என்பன சரியான சொற்கள்

கோர்வை, கோவை – பள்ளி ஆண்டுவிழாக்களில் “ஊசி நூல் கோர்த்தல் போட்டி” அறிவிக்கிறார்கள். கோர்த்தல் என்பது தவறு. கோத்தல் என்பதே சரியானது. ஜலதோஷம்- நீர்க்கோவை என்பது அழகான நெல்லை வழக்கு! பேச்சு வழக்கில் விடுபட்ட ர், எழுத்திலும் விடுபட்டது! (நல்ல வேளை, ‘கோர்வை’ என்று எழுதாத, ‘கோவை’ நண்பர்கள் மகிழ்ச்சி தருகிறார்கள்!)

கழட்டி – கழற்றி - “என்ன சாதிச்சுட்டே?” எனும் பொருளில் “என்ன கழட்டிட்டே?” என்கிறார்கள். அது தவறு.  கழற்று  என்பதே சரி. தன் சக மனிதனை அழைத்து, “செருப்பைக் கழட்டுடா” என்பது இரட்டைத் தவறு!  சானட்-சானற் என, ட் வல்லினத்தை, ற் என்றே ஈழத்தமிழ் சொல்வதை ஆய்வு செய்தல் நன்று.        

பட்டினமும் பட்டணமும் – கடற்கரையில் அமைந்துள்ள ஊர்கள் ‘பட்டினம்’   எனும் பின்ஒட்டுப் பெற்று வரும். அதிராம் பட்டினம், நாகப் பட்டினம், விசாகப் பட்டினம் போல. ‘பட்டினப் பாலை’ நமது  சங்க இலக்கியங்களில் ஒன்று.

நகரத்தைப் பட்டணம் என்பார்கள். “கெட்டும் பட்டணம் போ” என்பது பழமொழி! “பட்டணம் தான் போகலாமடி பொம்பள பணம் காசு தேடலாமடி”  என்பது உடுமலை நாராயண கவியாரின் திரைப்பாட்டு. “டவுனுப் பக்கம் போகாதீங்க மாப்பிளே டவுனாகிப் போயிடுவீங்க” என்று, அதிலேயே பட்டணம் என்றால் நகரம் (டவுன்) என்பதையும் சொல்வார்! சென்னை, பட்டணம், பட்டினம் - இரண்டு வகையிலும் வழங்கும் பெருமைக்குரிய பேரூர்!

பிண்ணிட்டான் – சரியா? –“போலீசு அடி பிண்ணிருச்சு” என்கிறார்கள். கூடை ‘பிண்ண’ இணையத்தில் சொல்லித் தருகிறார்களாம்! பிண்ணு என்பது தவறு! சடை பின்னுதல், கூடை பின்னுதல் என்பன போல, “அடி பின்னிருச்சு“ என்பதே சரி. ஆனால், ‘என்ன பண்ணுச்சு தெரியுமா? அடி பிண்ணிருச்சு” என்பது போல இரண்டு சொற்களையும் குழப்பிக் கொள்வது தவறானது. சடை, சண்டை எதுவாயினும் ஒன்றன் பின் ஒன்றாக -பின் பின்னாக- பின்னுதல்தான் சரி,

---------------------------------------------------