தமிழ்இனிது-31 (நன்றி- 23-01-2024- இந்து தமிழ் நாளிதழ்)

  

சிறகு வேறு,  இறகு வேறு!  

கெடிகாரமா? கடிகாரமா?  

          கவிஞர் நேசன்மகதி, செய்தித்தாள் ஒன்றைப் புலனத்தில் அனுப்பி, “கெடிகாரமா? கடிகாரமா?” என்று கேட்டார். “விநாயகர் வடிவ கெடிகார விற்பனை“-விளம்பரமும் அந்த செய்தித் தாளில் இருந்தது!  உமறுப் புலவரின் ஆசிரியர் கடிகை முத்துப் புலவர் வந்து நமது மண்டையில் தட்ட, “கடிகை, கடிகாரம் தான் சரி“ என்றேன் (நன்றி-தமிழ்-தமிழ் அகர முதலி –த.நா.பாடநூல் கழகம்-பக்கம்-247/1985) வெண்கல மணி ஓசையில் காலம் அறிந்ததால், கடிகை - கடிகாரம் ஆனது.  கையில் கட்டுவதால் அல்ல, அளவில் சிறியதால் ‘கைக்கடிகாரம்’ ஆனது,!

 ‘கடிகா’ – பாலி, வடமொழி வழி ‘கடிகை’ எனும் கருத்து, தவறானது.

“மலர்ந்தும் மலராத” -பாசமலர்- பாடலில் “தங்க கடியாரம்“ என்று சுசிலாம்மா பாட, கண்ணதாசன் ‘கடிகாரம்’ என்றே எழுதியிருக்கிறார்.  

பதினெண் கீழ்க்கணக்கு நூல்களில் ஒன்றான ‘நான்மணிக் கடிகை’ பொ.ஆ.,4ஆம் நூற்றாண்டினது! “கடிகை வெண்பா“- அரசனுக்கு நேரம் சொல்லும் ஒரு சிற்றிலக்கியம்! கடிகை -நேரம் அளவிடு கருவி.  மதுரைக் காஞ்சி-532, நெடுநல் வாடை-142, கலித்தொகை-96/10, அகநானூறு35/3 எனசங்கநூல்களில் வரும்.          “பாலையில் செல்வோர் கடிகை கொண்டு செல்வர்”. "கடிகை  நாழிகையே" - சூடாமணி நிகண்டு. 

பிறகு கடிகை-கடிகாரம் என்பது ‘கெடிகாரம்’ ஆனது எப்படி? கங்கை –கெங்கை என்றும் (குடியாத்தம் கெங்கையம்மன் கோவில்), கரகம் – கெரகம் என்றும் (கரகாட்டக் காரன் - கோவை சரளா) பேச்சு வழக்கில்     க, கெ ஆக,  கடிகாரம் கெடிகாரம் ஆகியிருக்கலாம்.  ஆனால் பெருவழக்கிலும் எழுத்திலும் கடிகாரம் என்பதே தமிழ்ச்சொல்.  என்ன செய்ய? கடிகாரத்திற்கே ‘நேரம்’ சரியில்லை  போல!  ‘கெரகம்’தான்!  

எம்பளது – நுப்பது

எண்பதை ‘எம்பளது’, என்றும் முப்பதை ‘நுப்பது’ என்றும் சொல்வது, பழைய  தஞ்சை மாவட்ட மக்கள் வழக்கு. எழுதும்போது, சரியாக எழுதுவர். இது எப்படி வந்ததென்று சொல்லாய்வரே சொல்ல வேண்டும்! தப்பான  உச்சரிப்போடு நெடுங்காலமாக வழக்கில் இருப்பது மட்டும் உண்மை!

அரைவை – அறைவை

           சென்னையிலிருந்து பள்ளி  மாணவி ஜூலியானா, “அரைவை எந்திரமா? அறைவை எந்திரமா?” என்று கேட்டார். நல்ல கேள்வி!  அறவை, அறைவை என்பன தவறானவை.  மாவு அரைக்குமிடம் – மாவு அரவை ஆலை. புடைவையைப் புடவை என்றும், உடைமையை உடமை என்றும் வழங்குவது போல, அரைக்கும் அரைவையை அரவை என்றே ஏற்கலாம். மரம் அறுக்கும் மர அறுவை ஆலை என்பது வேறு.

இறக்கை – றெக்கை – ரெக்கை

இறக்கை – wings- இறகு, பெரியது. 

றெக்கை - பேச்சு வழக்கு. 

சிறகு –feather- இறக்கையின் சிறுபகுதி- சிறியது. 

“காதல் சிறகை காற்றினில் விரித்து” –கண்ணதாசன் பாடல்.   

“சிறகுக்குள் வானம்” – ஆர்.பாலகிருஷ்ணன் கட்டுரைகள் - பாரதி புத்தகாலயம். ‘சிறகு’ என்றே  மின்னிதழ் ஒன்றும் வருகிறது!

இறகிலிருந்து பிரிவதே சிறகு, ஆனால், பெரும்பாலும் --வழக்கை முன்வைத்து—சிறகை, இறகு-இறக்கை எனும் பொருளில்  எழுதுகின்றனர். இதை இலக்கணத்தில் (சிறகு எனும் உறுப்பு, இறகு-இறக்கை எனும் முதலுக்கு ஆகிவருவதால்)  சினையாகுபெயர் என்பர். ரெக்கை என்பது பிழை வழக்கு.  சிறகு விரிக்கட்டும் புதிய சிந்தனைகள்!   

(நன்றி - இந்து தமிழ் நாளிதழ் - 23-1-2024 செவ்வாய்)

நண்பர்கள் சிலர் தொலைபேசியில் அழைத்து,
“என்ன இந்த வாரம் இப்படி வடிவமைத்து விட்டீர்கள்?” என்று
என்னைக் கேட்டார்கள்! கோப்பாகச் சேர்ப்போர், பள்ளி கல்லூரி, பயிலகங்களின் சுற்றறிக்கைப் பலகையில் இதை
ஒட்டிவைப்பது சிரமம் என்றார்கள்!  
( மதுரை உலகத் தமிழ்ச் சங்கச் சுற்றறிக்கைப் பலகையில் 
“தமிழ் இனிது” கட்டுரைகளை ஒட்டுகிறார்களாம்! 
அந்த நல்லுள்ளங்களுக்கு எனது வணக்கம் கலந்த நன்றி )

                                     --------------------------------------------------------------------